Hendrik, Krane

Wie hebt de paosdaag'n alweer ehad en het mooie weer kump er an. Ik hadde het de veurige keer al over die stubbegies en wa'k in de kop hadde mos ik noe mar iens doen.
Ik hebbe Thijs op ebeld en evrôgd of e een keer wol kom'n kiek'n. Det wol e wéh!
Goed met mekare of epraot en d'r zol 10 kuub grond over de stubbegies gaon. De krane d'r bie um een paar stukkies umme te gooi'n. De braam'n onder de grond warken en klaor.
Op zaoterdagmôrn kwaam ze d'r an, 4 potige keerls uut Wietum. Een krane en een trekker met 10 kuub grond. Eerst mar iens een bakkie koffie en dan an't wark.

Ach, wat gunk det mooi! Daor kuj met de schuppe niet teeg'n an! Tom die op de krane zat was net bezig met de braam'n toen e in ien keer een schreeuw gaf, dus ik kieke op en zag det e wat uut de grond haald'n met de krane. Wat was det? Een groot rond dink van iezer en ik wusse ok nie wat det noe mos weez'n. Iniens zegt d'r iene:"Det kon wéh een mijn weene, een landmijn uut de oorlog!"

Ik kieke naor het dink en naor de krane en kon wéh janken van ellende! Eindelijk de krane d'r bie en noe kwamp et nie of. Wat noe? De keer'l op de krane had nog een maot die in ut leger zat en zol iens vraog'n wat ut was. De jongeleu van vandaage hebt allemaole een luliezer waor ai ok foto's met kunt maak'n, dus foto van ut dink emaakt en noe mar of wacht'n. Gien twiefel! Een landmijn! Mar hoe mos det noe met mien tuun? Ik pakke de kruulewaag'n en wol ut dink er hiel veurzichtig op leg'n, det hek edaon en toen bin ik hiel veurzichtig 30 meter fort eloop'n en daor heb ik de kruulewaag'n neer ezet. En noe?

Eerst de pliessie mar iens ebeld. Weet ie wat ze daor zeg'n. NIET in de buurte koom'n en veural NIET an raak'n! De EOD kump wel effen kiek'n. Nou ik kwam d'r niet meer in de buurte en de keerls konden ut wark of maak'n. De keerls bint naor huus an egaon en ik mosse wachten op de Explosieve Opsporings Dienst.

Nog gien uurtie later kwaam ze d'r an, want zie mossen uut Amersfoort koom'n, witte pakken an en daor liep'n ze deur de tuune. Heel veurzichtig leup'n ze naor ut dink toe en ik bleve op een flinke ofstand kiek'n wat of d'r ging gebeuren, as ut dink maor niet ontploft'n, want dan hei een boel narigheid! En ik heure een gelach en ik zie det ze mekare op de scholders sloat en ze kiekt mie an.....
Zegt de ene meneer:" Meneer, het is een echte... een hele echte betonnen parasolvoet!
Verdere woord'n bint hier overbodig, de buur'n hebt krom eleeg'n van ut lach'n!

Het giet jullie goed! Maak er veur de koomde tied wat moois van!
Groet'n Hendrik